کانگو کے دو سکولوں میں آتشزدگی سے 29 طلبا جاں بحق، 300 گھر خاکستر

مشرقی جمہوری جمہوریہ کانگو کے شہر بوکاوو میں ایک دلدوز اور خوفناک آتشزدگی کے نتیجے میں 29 طالب علم جاں بحق جبکہ 300 سے زائد مکانات اور دو سکول جل کر خاکستر ہو گئے ہیں۔ مقامی انتظامیہ کے مطابق آگ ابتدائی طور پر ایک رہائشی مکان میں بھڑکی، جس نے تیز ہواؤں اور گنجان آبادی کے باعث دیکھتے ہی دیکھتے ہولناک شکل اختیار کر لی اور آسٹ پاس واقع دو سکولوں سمیت سیکنڑوں گھروں کو اپنی لپیٹ میں لے لیا۔

اس تباہ کن آتشزدگی کے نتیجے میں جہاں کروڑوں روپے کا مالی و معاشی نقصان ہوا، وہیں سکولوں میں موجود 29 معصوم بچوں کی دم گھٹنے اور جھلسنے سے جانیں چلی گئیں، جن میں 19 طالبات اور 10 طلبہ شامل ہیں۔ حکام کی جانب سے جاں بحق ہونے والے تمام بچوں کی اجتماعی تدفین کا عمل مکمل کر دیا گیا ہے۔ آخری رسومات کے موقع پر پورا علاقہ سوگوار منظر پیش کر رہا تھا اور اپنے لختِ جگر کو کھو دینے والے والدین شدتِ غم سے نڈھال نظر آئے۔

مقامی انتظامیہ اور امدادی ٹیموں نے متاثرہ علاقے میں کارروائیاں کرتے ہوئے ہنگامی صورتحال نافذ کر دی ہے۔ حکام کی جانب سے آتشزدگی کی حتمی وجوہات کا تعین کرنے کے لیے تحقیقات کا آغاز کر دیا گیا ہے، جبکہ بے گھر ہونے والے سیکنڑوں افراد کے لیے عارضی امدادی کیمپ قائم کیے جا رہے ہیں۔