آبنائے ہرمز میں آئل ٹینکر بارودی سرنگوں سے ٹکرا کر تباہ

ایران کے پاسدارانِ انقلاب (IRGC) نے دعویٰ کیا ہے کہ آبنائے ہرمز کے جنوب مشرقی علاقے میں ایک تیل بردار جہاز (آئل ٹینکر) سمندری بارودی سرنگوں سے ٹکرا کر تباہ ہو گیا۔ پاسدارانِ انقلاب کی جانب سے جاری بیان کے مطابق شدید دھماکے کے بعد ٹینکر میں ہولناک آگ بھڑک اٹھی۔ ایرانی حکام کا موقف ہے کہ مذکورہ ٹینکر ایک ممنوعہ اور خطرناک بحری علاقے سے گزرنے کی کوشش کر رہا تھا، حالانکہ اسے غیر قانونی راستے سے اجتناب کرنے کے حوالے سے پہلے ہی واضح انتباہ جاری کیا جا چکا تھا۔

دوسری جانب، امریکہ نے ٹینکر کے بارودی سرنگ سے ٹکرانے کے اس ایرانی دعوے کو من گھڑت قرار دیتے ہوئے یکسر مسترد کر دیا ہے۔ امریکی سینٹرل کمانڈ (سینٹ کام) کا کہنا ہے کہ پاناما کا پرچم بردار ٹینکر “ایل گایا” (El Gaia) بارودی سرنگ سے نہیں بلکہ پہلے سے جاری ایرانی میزائل اور ڈرون حملوں کا نشانہ بنا تھا، جس کے باعث جہاز مکمل طور پر ناکارہ اور شل ہو کر رہ گیا تھا۔ امریکی عسکری حکام کے مطابق ایران اپنے عسکری حملوں کو چھپانے کے لیے گمراہ کن اور بے بنیاد ادعا کر رہا ہے۔