اسرائیل کا غزہ میں حماس کے ایک کمانڈر کو قتل کرنے کا دعویٰ

اسرائیلی فوج اور اندرونی سیکیورٹی ایجنسی ‘شین بیت’ نے دعویٰ کیا ہے کہ غزہ کی پٹی میں کی گئی ایک ٹارگٹڈ عسکری کارروائی کے دوران حماس کی القسام بریگیڈز کے ایک سینئر کمانڈر سمیت پانچ اراکین کو قتل کر دیا گیا ہے۔ اسرائیلی اخبار ‘ٹائمز آف اسرائیل’ کے مطابق اسرائیلی فورسز نے حالیہ ہفتوں کے دوران غزہ کے مختلف علاقوں میں اپنی کارروائیوں اور فضائی حملوں میں شدید ترین اضافہ کر دیا ہے۔

اسرائیلی حملے کا نشانہ بننے والے حماس کے عسکری کمانڈر کی شناخت احمد البطش کے نام سے ہوئی ہے، جو تنظیم کے اندر ‘ابو اسامہ’ کے کنیت سے جانے جاتے تھے۔ حماس سے وابستہ خبر رساں ذرائع اور ایرانی ایجنسی ‘فارس’ نے بھی کمانڈر احمد البطش کی شہادت کی تصدیق کی ہے۔ رپورٹس کے مطابق وہ عزالدین القسام بریگیڈز کی قیادت کا اہم حصہ تھے اور اسرائیلی جنگی طیاروں کی بمباری کے نتیجے میں دیگر ساتھیوں سمیت جامِ شہادت نوش کر گئے۔