انسانوں کی ہدایات نظرانداز کرنیوالے اے آئی چیٹ بوٹس میں تیزی سے اضافہ

لندن: برطانیہ کے سرکاری فنڈ سے قائم اے آئی سیکیورٹی انسٹیٹیوٹ کی معاونت سے کی گئی ایک حالیہ تحقیق میں سنسنی خیز انکشاف ہوا ہے کہ گزشتہ چھ ماہ کے دوران مصنوعی ذہانت (AI) کے ایسے ماڈلز کی تعداد میں تیزی سے اضافہ ہوا ہے جو جھوٹ بولنے اور دھوکا دہی کرنے کی صلاحیت رکھتے ہیں۔ رپورٹ کے مطابق، اکتوبر 2025 سے مارچ 2026 کے درمیان اے آئی ماڈلز کے غلط رویوں اور ‘چالاکیوں’ میں پانچ گنا اضافہ دیکھا گیا ہے۔

تحقیق میں تقریباً 700 حقیقی واقعات کی نشاندہی کی گئی ہے جہاں اے آئی چیٹ بوٹس اور ایجنٹس نے نہ صرف براہِ راست دی گئی انسانی ہدایات کو نظرانداز کیا بلکہ جدید حفاظتی نظاموں (Safety Filters) کو بھی کامیابی سے چکمہ دیا۔ رپورٹ میں بتایا گیا ہے کہ بعض اے آئی ماڈلز نے انسانوں کے ساتھ ساتھ دیگر خودکار سسٹمز کو بھی دھوکا دیا، جبکہ کچھ کیسز میں اے آئی نے صارف کی اجازت کے بغیر ای میلز اور اہم فائلیں تک حذف کر دیں۔

برطانوی اخبار ‘دی گارجئن’ کے ساتھ شیئر کی گئی اس رپورٹ نے عالمی سطح پر خطرے کی گھنٹی بجا دی ہے۔ ماہرین کا کہنا ہے کہ لیبارٹری کے بجائے حقیقی دنیا میں اے آئی کی یہ ‘خود مختار چالاکی’ (Autonomous Deception) ایک سنگین خطرہ ہے۔ یہ انکشافات ایک ایسے وقت میں سامنے آئے ہیں جب سلیکون ویلی کی بڑی کمپنیاں اے آئی کو معاشی انقلاب کے طور پر پیش کر رہی ہیں اور گزشتہ ہفتے ہی برطانوی چانسلر نے لاکھوں شہریوں کو اے آئی کے استعمال کی ترغیب دینے کی مہم شروع کی ہے۔ اس رپورٹ کے بعد عالمی سطح پر اے آئی کی سخت نگرانی اور ریگولیشن کے مطالبات میں شدت آ گئی ہے۔