انٹرنیٹ کو بھی بنیادی سروس قرار دینے پر غور، وزارت آئی ٹی کا قانونی جائزہ مکمل

ومتِ پاکستان نے پانی، بجلی اور گیس کی طرح اب انٹرنیٹ کو بھی بنیادی لازمی سروس قرار دینے پر غور شروع کر دیا ہے۔ اس سلسلے میں وزارتِ انفارمیشن ٹیکنالوجی (آئی ٹی) نے اپنا ابتدائی قانونی جائزہ مکمل کر لیا ہے۔

سینیٹ کی ذیلی کمیٹی کو جمع کرائی گئی وزارتِ آئی ٹی کی تحریری رپورٹ کے مطابق، ملک میں فی الحال انٹرنیٹ کو بنیادی سروس قرار دینے کا کوئی قانون موجود نہیں ہے اور نہ ہی آئینِ پاکستان میں انٹرنیٹ تک رسائی کو ایک الگ آئینی حق کے طور پر تسلیم کیا گیا ہے۔ اس اقدام کو عملی جامہ پہنانے کے لیے باقاعدہ نئی قانون سازی یا موجودہ قوانین میں ترامیم درکار ہوں گی۔

وزارتِ آئی ٹی کا کہنا ہے کہ انٹرنیٹ اب قومی انفراسٹرکچر اور ڈیجیٹل معیشت کی بنیاد بن چکا ہے، اور اس کی بندش سے ملکی معیشت، بینکاری، تعلیم اور صحت کے شعبے شدید متاثر ہونے کا خدشہ رہتا ہے۔ انٹرنیٹ کو بنیادی سروس کا درجہ دینے سے ای گورننس، ای کامرس اور ڈیجیٹل ادائیگیوں کا تحفظ ممکن ہو سکے گا۔

رپورٹ میں واضح کیا گیا ہے کہ اس اہم فیصلے کے لیے وزارتِ قانون، وزارتِ داخلہ، وزارتِ دفاع، پی ٹی اے اور تمام ٹیلی کام کمپنیوں سے مشاورت لازمی ہوگی۔ قانون سازی کی صورت میں ٹیلی کام کمپنیوں کے لیے بیک اپ نیٹ ورک، ڈیزاسٹر ریکوری اور سروس کے کم از کم معیار کو یقینی بنانا قانونی طور پر لازم ہوگا، جس کے بعد ٹیلی کام کے شعبے میں مزید سرمایہ کاری اور سائبر سیکیورٹی کے سخت اقدامات ناگزیر ہو جائیں گے