اقوام متحدہ کا ڈاکٹر حسام ابو صفیہ کی فوری رہائی کا مطالبہ

اقوام متحدہ کے انسانی حقوق کے ورکنگ گروپ نے اسرائیلی قید میں موجود غزہ کے نامور ڈاکٹر حسام ابو صفیہ کی حراست کے خلاف سخت تادیبی موقف اختیار کیا ہے۔ اقوام متحدہ کے گروپ نے ڈاکٹر حسام کی گرفتاری کو مکمل طور پر من مانی اور غیر قانونی قرار دیتے ہوئے صیہونی حکام سے ان کی فوری رہائی کا مطالبہ کیا ہے۔

واضح رہے کہ اس سے قبل انسانی حقوق کی متعدد بین الاقوامی تنظیموں اور خود ڈاکٹر حسام ابو صفیہ کے قانونی وکیل نے شدید تشویش کا اظہار کرتے ہوئے خبردار کیا تھا کہ زیرِ زمین اسرائیلی جیل میں قید فلسطینی ڈاکٹر کی جان کو فوری اور انتہائی سنگین خطرات لاحق ہیں اور انہیں تشدد کا نشانہ بنایا جا رہا ہے۔

اقوام متحدہ کے ورکنگ گروپ نے اپنے جاری کردہ بیان میں واشگاف الفاظ میں کہا ہے کہ اسرائیل کی جانب سے ڈاکٹر حسام ابو صفیہ کو بغیر کسی جرم اور عدالتی چالان کے قید میں رکھنا انسانی حقوق کے عالمی اعلامیے (Universal Declaration of Human Rights) اور شہری و سیاسی حقوق کے بین الاقوامی قوانین کی متعدد شقوں کی سنگین خلاف ورزی ہے۔

عالمی ادارے نے زور دے کر مطالبہ کیا ہے کہ ڈاکٹر حسام ابو صفیہ کو نہ صرف فوری طور پر رہا کیا جائے، بلکہ بین الاقوامی قوانین کے اصولوں کے مطابق طویل عرصے تک بغیر کسی جرم کے زیرِ حراست رکھنے اور ذہنی و جسمانی اذیت پہنچانے کے عوض انہیں مناسب مالی معاوضہ اور دیگر قانونی تلافی کا قابلِ نفاذ حق بھی فراہم کیا جائے۔