پاکستان میں انٹرنیٹ اور ٹیکنالوجی کی سہولیات میں نمایاں اضافہ، عالمی درجہ بندی بھی بہتر

پاکستان نے عالمی سطح پر ڈیجیٹلائزیشن کے میدان میں ایک اور اہم سنگ میل عبور کر لیا ہے۔ بین الاقوامی ٹیلی کمیونیکیشن یونین (ITU) کے جاری کردہ ‘آئی سی ٹی ڈویلپمنٹ انڈیکس 2026’ میں پاکستان کی درجہ بندی اور اسکور میں نمایاں بہتری سامنے آئی ہے۔ رپورٹ کے مطابق، پاکستان کا مجموعی اسکور 56.4 سے بڑھ کر 67.7 تک پہنچ گیا ہے، جو کہ مجموعی طور پر 20 فیصد کی شاندار بہتری کو ظاہر کرتا ہے۔

عالمی رپورٹ کے مطابق، پاکستان نے ‘کنیکٹیویٹی’ (Connectivity) کے شعبے میں غیر معمولی کارکردگی کا مظاہرہ کرتے ہوئے 22.8 پوائنٹس کا اضافہ حاصل کیا ہے، جس کے بعد ملک کا ‘میننگ فل کنیکٹیویٹی اسکور’ (Meaningful Connectivity Score) اب 79 کی اعلیٰ سطح پر جا پہنچا ہے۔ اس انقلابی پیشرفت کے نتیجے میں بین الاقوامی انڈیکس کی درجہ بندی (Ranking) میں پاکستان کی پوزیشن میں اندازاً 27 درجے کی بڑی بہتری ریکارڈ کی گئی ہے، جسے ملک کے ڈیجیٹل سفر میں ایک گیم چینجر قرار دیا جا رہا ہے۔

اس تاریخی کامیابی پر خوشی کا اظہار کرتے ہوئے وفاقی وزیر برائے انفارمیشن ٹیکنالوجی و ٹیلی کام شزہ فاطمہ خواجہ نے کہا کہ وزیراعظم محمد شہباز شریف کی دوراندیش قیادت میں حکومت آئی ٹی اور ٹیلی کام کے شعبے کو اولین ترجیحات میں شامل رکھے ہوئے ہے۔

ان کا کہنا تھا کہ ملک میں بہتر ہوتی ہوئی کنیکٹیویٹی اور انٹرنیٹ کی رسائی سے ہمارے باصلاحیت نوجوانوں، طلبہ، فری لانسرز اور کاروباری افراد کے لیے ترقی کے بے شمار نئے مواقع پیدا ہوں گے۔ انہوں نے عزم کا اعادہ کیا کہ حکومت پاکستان بھر میں سستی، قابلِ اعتماد اور معیاری ڈیجیٹل سروسز کی فراہمی کے لیے اپنے اقدامات مسلسل جاری رکھے گی۔

وفاقی وزیر آئی ٹی نے مزید کہا کہ آئی ٹی یو (ITU) انڈیکس میں پاکستان کی اس شاندار سفارتی و تکنیکی کامیابی سے عالمی سرمایہ کاروں اور بڑی بین الاقوامی ٹیکنالوجی کمپنیوں کو ایک انتہائی مثبت اور جاندار پیغام جائے گا، جس سے ملک میں غیر ملکی سرمایہ کاری کی راہیں ہموار ہوں گی۔