وزیراعظم انسدادِ ہیپاٹائٹس پروگرام، ڈیڑھ لاکھ شہریوں کی ہیپاٹائٹس سی سکریننگ مکمل

وفاقی دارالحکومت اسلام آباد میں ‘وزیراعظم انسدادِ ہیپاٹائٹس پروگرام’ کے تحت ہیپاٹائٹس سی کی سکریننگ اور مفت علاج کا عمل کامیابی کے ساتھ جاری ہے، جس کے دوران اب تک 1 لاکھ 50 ہزار شہریوں کے تشخیصی ٹیسٹ مکمل کر لیے گئے ہیں۔

صحت عامہ کے حکام کے مطابق، کی گئی سکریننگ کے دوران عام آبادی میں 2 سے 2.5 فیصد افراد میں ہیپاٹائٹس سی کا وائرس پایا گیا ہے، جبکہ صحت کی بنیادی سہولیات سے محروم اور پسماندہ علاقوں میں اس مرض کی شرح تشویشناک حد تک 6 فیصد تک ریکارڈ کی گئی ہے۔ پمز (PIMS)، پولی کلینک اور دیگر سرکاری ہسپتالوں و بنیادی مراکزِ صحت میں سکریننگ جاری ہے۔ ابتدائی ٹیسٹ مثبت آنے والے افراد کے پی سی آر (PCR) ٹیسٹ کروائے جا رہے ہیں تاکہ حتمی تشخیص کی جا سکے، اور جن مریضوں میں بیماری کی تصدیق ہو رہی ہے انہیں حکومت کی جانب سے مفت ادویات فراہم کی جا رہی ہیں۔

وفاقی حکومت نے ہیپاٹائٹس سی کی سکریننگ کا دائرہ کار ملک گیر سطح پر وسیع کرنے کا فیصلہ کیا ہے۔ منصوبے کے تحت خیبر پختونخوا کو تشخیصی کٹس اور ادویات کی فراہمی کا آغاز کر دیا گیا ہے، جبکہ اگلے مراحل میں بالترتیب سندھ، بلوچستان اور پنجاب کو بھی کٹس فراہم کی جائیں گی۔ حکام کا کہنا ہے کہ اس پروگرام کا بنیادی مقصد 2030ء تک پاکستان سے ہیپاٹائٹس سی کا مکمل خاتمہ یقینی بنانا ہے۔