پاکستان میں 2026 کا نواں پولیو کیس خیبر سے رپورٹ

پاکستان میں سال 2026 کا نواں پولیو کیس خیبرپختونخوا کے ضلع خیبر سے رپورٹ ہوا ہے، جس کے بعد رواں برس ملک بھر میں پولیو کے مجموعی کیسز کی تعداد 9 ہو گئی ہے۔ نیشنل ایمرجنسی آپریشنز سینٹر (NNEOC) کے مطابق رواں سال سامنے آنے والے کیسز میں سے 7 خیبرپختونخوا اور 2 سندھ سے رپورٹ ہوئے ہیں۔ اس وقت ضلع خیبر سمیت ملک کے 97 اضلاع میں پاک افغان مشترکہ انسدادِ پولیو مہم جاری ہے، جس کے تحت 5 سال سے کم عمر کے تقریباً 2 کروڑ 40 لاکھ بچوں کو پولیو سے بچاؤ کے قطرے پلائے جا رہے ہیں۔ ہیلتھ حکام نے تاکید کی ہے کہ پولیو ایک لاعلاج معذوری کا باعث بننے والا مرض ہے جس سے صرف بروقت ویکسینیشن ہی تحفظ فراہم کر سکتی ہے، اس لیے والدین پولیو کے قطرے اور حفاظتی ٹیکہ جات لازمی مکمل کروائیں۔