جی ایل پی ون ادویات سے ذیابیطس کا خطرہ 31 فیصد کم ہونے کا انکشاف

ایک نئی طبی تحقیق میں انکشاف ہوا ہے کہ موٹاپے اور ذیابیطس سے قبل کی کیفیت (پری ڈائیبیٹیز) کا شکار افراد میں ‘جی ایل پی-1’ (GLP-1) ادویات کے استعمال سے ٹائپ ٹو ذیابیطس لاحق ہونے کا خطرہ 31 فیصد تک کم ہو سکتا ہے۔ امریکن ہارٹ ایسوسی ایشن کے سائنٹفک سیشنز 2026 میں پیش کی جانے والی اس تحقیق کے مطابق، 104 طبی اداروں کے 2010 سے 2023 تک کے ہیلتھ ریکارڈز کے تجزیے سے معلوم ہوا کہ سیمیگلوٹائیڈ اور ٹرزیپاٹائیڈ جیسے جی ایل پی-1 فارمولے میٹفارمن کے مقابلے میں زیادہ مؤثر ثابت ہوئے ہیں۔ ڈاکٹر وینیسیئس ڈی سوسا بارزون سیرا کی سربراہی میں کی گئی تحقیق میں یہ بھی سامنے آیا ہے کہ ان ادویات کے استعمال سے دل کے دورے، فالج اور ہارٹ فیلئر کے واقعات میں کمی آئی جبکہ کسی بھی وجہ سے موت کا خطرہ بھی 41 فیصد کم دیکھا گیا۔ تاہم، ماہرین کا کہنا ہے کہ اعلیٰ قیمتوں اور انشورنس کی منظوری میں مشکلات کے علاوہ یہ ایک مشاہداتی تحقیق ہے، جسے فی الحال ابتدائی نتائج قرار دیا جا رہا ہے۔