190 ملین پاؤنڈ کیس: بشریٰ بی بی کا مکمل میڈیکل ریکارڈ کیلئے ہائیکورٹ سے رجوع

190 ملین پاؤنڈ کیس میں گرفتار بشریٰ بی بی نے مناسب طبی سہولیات اور مکمل میڈیکل ریکارڈ کے حصول کے لیے اپنے وکلا بیرسٹر سلمان صفدر اور سلمان اکرم راجہ کے توسط سے اسلام آباد ہائیکورٹ میں متفرق درخواست دائر کر دی ہے۔ درخواست میں استدعا کی گئی ہے کہ اڈیالہ جیل حکام سے ان کی تازہ اور جامع میڈیکل رپورٹ طلب کی جائے اور علاج معالجے سے متعلق تمام دستاویزات عدالت میں پیش کی جائیں۔ مؤقف اختیار کیا گیا ہے کہ بشریٰ بی بی کی آنکھوں کی حالت اور بینائی تیزی سے متاثر ہو رہی ہے، لہٰذا فوری طور پر ماہرِ امراضِ چشم سے معائنے اور جیل کے میڈیکل افسر کی مشاورت سے علاج کی اجازت دی جائے۔ اس کے علاوہ درخواست میں ذاتی خرچ پر نجی ماہر ڈاکٹر سے علاج اور جیل میں مناسب طبی سہولیات کی فراہمی کا حکم دینے کی بھی اپیل کی گئی ہے۔