امریکا ایران تنازع کا سفارتی حل تلاش کرنے کے لیے تیار ہے: قطری وزیر اعظم

قطر کے وزیراعظم اور وزیرِ خارجہ شیخ محمد بن عبدالرحمن آل ثانی نے کہا ہے کہ امریکا ایران کے ساتھ جاری تنازع کا سفارتی حل تلاش کرنے کے لیے مکمل طور پر تیار ہے اور امریکی انتظامیہ خطے میں کشیدگی کم کرنے کی سنجیدہ کوششیں کر رہی ہے۔ آکسفورڈ یونیورسٹی میں خطاب کرتے ہوئے قطری وزیراعظم نے انکشاف کیا کہ وہ گزشتہ دو ہفتوں سے امریکی حکام کے ساتھ مسلسل رابطے میں ہیں۔ انہوں نے واضح کیا کہ امریکی انتخابات کے نتائج کے باوجود سفارتی حل کے لیے واشنگٹن کا موقف تبدیل نہیں ہوا، اگرچہ حالیہ دنوں میں سفارتی رابطوں کی رفتار میں کمی آئی ہے لیکن یہ سلسلہ ختم نہیں ہوا۔ شیخ محمد بن عبدالرحمن نے عزم ظاہر کیا کہ قطر تہران اور واشنگٹن کے درمیان ثالثی کا کردار جاری رکھے گا اور اس بات پر زور دیا کہ مکمل امن معاہدے کا انتظار کرنے کے بجائے فی الوقت کشیدگی کم کرنے کے لیے قابلِ عمل اقدامات ضروری ہیں۔