این اے 77 کا ضمنی انتخاب: چوہدری سالک حسین کا قاضی ابراہیم گجر کی حمایت کا اعلان

سینئر وفاقی وزیر اور پاکستان مسلم لیگ (ق) کے سینئر نائب صدر چوہدری سالک حسین نے قومی اسمبلی کے حلقہ این اے 77 کے ضمنی انتخاب میں مرکزی مسلم لیگ کے امیدوار قاضی ابراہیم گجر کی حمایت کا باضابطہ اعلان کر دیا ہے۔ اس سلسلے میں دونوں جماعتوں کے رہنماؤں کے درمیان اہم سیاسی رابطہ ہوا، جس میں مرکزی مسلم لیگ کے ڈپٹی سیکرٹری جنرل خالد نیک گجر نے چوہدری سالک حسین سے ٹیلی فون پر رابطہ قائم کیا۔ گفتگو کے دوران خالد نیک گجر نے این اے 77 کے معرکے میں قاضی ابراہیم گجر کی حمایت پر ق لیگ کی قیادت اور بالخصوص چوہدری سالک حسین کا شکریہ ادا کیا۔ اس اتحاد سے حلقے کے ضمنی انتخاب میں سیاسی مسابقتی صورتحال میں اہم پیشرفت کی توقع کی جا رہی ہے۔