نئی آٹو پالیسی میں گاڑیوں کی برآمدات کو ترجیح دی گئی: ہارون اختر خان

وزیراعظم کے مشیر ہارون اختر خان نے وفاقی وزیر اطلاعات عطا اللہ تارڑ کے ہمراہ مشترکہ پریس کانفرنس کرتے ہوئے اعلان کیا ہے کہ نئی آٹو پالیسی میں گاڑیوں کی برآمدات اور الیکٹرک وہیکلز (EVs) کے فروغ کو خصوصی ترجیح دی گئی ہے۔ ہارون اختر نے بتایا کہ طویل مشاورت کے بعد مرتب کی گئی اس پالیسی پر عملدرآمد سے گاڑیاں بنانے کے اخراجات میں کمی آئے گی اور برآمدات میں اضافہ ہوگا۔ اس موقع پر وفاقی وزیر اطلاعات عطا اللہ تارڑ نے کہا کہ ملک میں الیکٹرک گاڑیوں اور اسکوٹیز کے تیزی سے بڑھتے ہوئے استعمال سے ماحولیاتی آلودگی اور فضا میں کاربن کی مقدار کم کرنے میں مدد ملے گی۔ انہوں نے مزید کہا کہ حکومت عام آدمی کی گاڑی میں بین الاقوامی سطح کی سہولیات کی فراہمی کو یقینی بنانا چاہتی ہے، جبکہ پیٹرولیم مصنوعات کی قیمتوں میں کمی کا رجحان بھی جاری ہے۔