پی ٹی آئی رہنما صنم جاوید کا شوہر سے خلع کیلئے فیملی کورٹ سے رجوع

پاکستان تحریک انصاف (پی ٹی آئی) کی رہنما صنم جاوید نے اپنے شوہر عتیق ریاض سے خلع کے حصول کے لیے لاہور کی فیملی کورٹ میں درخواست دائر کر دی ہے۔ عدالت نے ابتدائی سماعت کرتے ہوئے صنم جاوید کے شوہر عتیق ریاض کو نوٹس جاری کرتے ہوئے ان سے جواب طلب کر لیا ہے۔ درخواست میں مؤقف اختیار کیا گیا ہے کہ 22 ستمبر 2009 کو ہونے والے نکاح کے بعد سے میاں بیوی کے درمیان ذہنی ہم آہنگی کے مسائل اور غلط فہمیاں رہیں جو وقت کے ساتھ بڑھتی گئیں، جس کے بعد اب بطور بیوی ساتھ رہنا ناممکن ہو چکا ہے۔ واضح رہے کہ نو مئی کے مقدمات میں سزا کی مد میں کوٹ لکھپت جیل میں قید صنم جاوید کی خلع کی اس درخواست پر آئندہ سماعت 25 نومبر کو ہوگی۔