منڈی بہاؤالدین میں گرین ٹریکٹرز سکیم کے تحت 12 کسانوں کو چابیاں دے دی گئیں

پنجاب حکومت کی کسان دوست پالیسی کے تحت ضلع منڈی بہاؤالدین میں گرین ٹریکٹرز اسکیم کی ابتدائی تقریبِ تقسیم چابیاں منعقد ہوئی، جہاں ممبر صوبائی اسمبلی و پارلیمانی سیکرٹری خالد محمود رانجھا نے 12 خوش نصیب کاشتکاروں میں ہائی پاور گرین ٹریکٹرز کی چابیاں تقسیم کیں۔ اس موقع پر خالد محمود رانجھا نے بتایا کہ وزیراعلیٰ پنجاب مریم نواز شریف کی ہدایت پر ہر کاشتکار کو فی ٹریکٹر 7 لاکھ 50 ہزار روپے کی رعایت اور سبسڈی دی جا رہی ہے۔ انہوں نے انکشاف کیا کہ شفّاف آن لائن قرعہ اندازی کے ذریعے ضلع کے مجموعی طور پر 174 کاشتکاروں کا انتخاب کیا گیا ہے جنہیں مرحلہ وار جدید زرعی مشینری منتقل کی جائے گی۔ انہوں نے امید ظاہر کی کہ اس اقدام سے جدید کاشتکاری کو فروغ ملے گا اور زرعی پیداوار میں نمایاں اضافہ ہوگا، جس پر مقامی کاشتکاروں نے صوبائی حکومت کا شکریہ ادا کیا۔