مولانا صاحب کو حصہ نہیں ملا، وہ ناراض ہیں: فیصل کریم کنڈی

گورنر خیبر پختونخوا فیصل کریم کنڈی نے میڈیا سے گفتگو کرتے ہوئے کہا ہے کہ مولانا فضل الرحمان کو حکومت میں حصہ نہیں ملا، اسی لیے وہ ناراض ہیں، تاہم ان کے بغیر حکومت بنی ہے اور چلتی بھی رہے گی۔ پشاور میں صحافیوں سے بات چیت کرتے ہوئے انہوں نے واضح کیا کہ صوبے میں دہشت گردی کے خاتمے کے لیے انٹیلی جنس بیسڈ آپریشنز کا سلسلہ جاری ہے، جس سے امن و امان کی صورتحال میں بہتری آئے گی۔ ہیلی کاپٹر کے استعمال پر تنقید کا جواب دیتے ہوئے انہوں نے کہا کہ ہیلی کاپٹر سرکاری امور کی انجام دہی کے لیے استعمال کیا گیا، کسی عیاشی کے لیے نہیں۔ گورنر کے پی نے مزید بتایا کہ تجاوزات کے خاتمے، ریڑھی بانوں کی متبادل جگہ کی فراہمی، انسدادِ پولیو ورکرز کے تحفظ اور صوبے کی بہتری کے لیے قانون سازی پر حکومت سنجیدگی سے اقدامات کر رہی ہے۔