’13 لاکھ روپے کا ایک سیرپ‘، جناح اسپتال میں جینیاتی مریضوں کو دوا کی مفت فراہمی

حکومتِ سندھ نے جناح پوسٹ گریجویٹ میڈیکل سینٹر (JPMC) کراچی میں جینیاتی بیماری اسپائنل مسکولر ایٹروفی (SMA) میں مبتلا مریضوں کے لیے مہنگے ترین علاج کی مفت فراہمی کا باضابطہ آغاز کر دیا ہے۔ انمول پروگرام کے تحت رجسٹرڈ 21 بچوں اور 4 بالغ مریضوں کو 13 لاکھ روپے سے زائد مالیت کے ریسڈیپلام سیرپ کی پہلی بوتل فراہم کر دی گئی ہے، جبکہ محکمہ صحت نے ان مریضوں کے چار سالہ علاج کے لیے 26 کروڑ روپے مختص کیے ہیں۔ روش پاکستان کے تعاون سے معاہدے کے تحت ایک بوتل خریدنے پر 3 بوتلیں مفت ملیں گی، جس کے تحت ہر مریض کو سالانہ 24 اور چار سال میں مجموعی طور پر 96 بوتلیں فراہم کی جائیں گی۔ اسپتال انتظامیہ کے مطابق 25 ابتدائی مریضوں کے بعد اب مزید مستحق افراد کی اہلیت اور رجسٹریشن کے لیے ماہر ڈاکٹروں کا خصوصی میڈیکل بورڈ تشکیل دیا جا رہا ہے۔