عوام پر ایک اور بوجھ، بجلی فی یونٹ 2 روپے 36 پیسے مہنگی

نیشنل الیکٹرک پاور ریگولیٹری اتھارٹی (نیپرا) نے ستمبر کے لیے ماہانہ فیول کاسٹ ایڈجسٹمنٹ کی مد میں بجلی 2.36 روپے فی یونٹ مہنگی کر دی ہے، جس کا اطلاق کے الیکٹرک سمیت ملک بھر کے ڈسکوز کے نومبر کے بلوں پر ہوگا۔ اس کے ساتھ ہی نیپرا نے صنعتی شعبے کے لیے قائم ‘انکریمنٹل سپورٹ پیکیج’ کے تحت خصوصی ٹیرف بھی 22.98 روپے سے بڑھا کر 25.30 روپے فی یونٹ کرنے کی منظوری دے دی ہے۔ ٹیرف کے اضافے پر اتھارٹی کے ارکان میں شدید اختلافِ رائے سامنے آیا، جہاں ممبر ٹیرف اور ممبر ڈیولپمنٹ نے فیصلے پر شدید تحفظات کا اظہار کرتے ہوئے اختلافی نوٹ لکھا، تاہم چیئرمین نیپرا نے اپنے فیصلے کن ووٹ (Casting Vote) کا استعمال کرتے ہوئے اس اضافے کو منظور کر لیا۔ نیپرا کی جانب سے پاور ڈویژن کی بروقت معلومات نہ دینے اور قانونی ذمہ داریاں پوری نہ کرنے پر بھی شدید تنقید کی گئی۔