اگر لیوی کے حوالے سے حکومت نے اقدام نہیں کیا تو ہم پھر سڑکوں پر آئینگے، امیر جماعت اسلامی

امیر جماعت اسلامی حافظ نعیم الرحمان نے حکومت کو خبردار کیا ہے کہ اگر پیٹرولیم مصنوعات پر عائد لیوی ختم نہ کی گئی تو جماعت اسلامی ایک بار پھر سڑکوں پر نکلے گی۔ کراچی کے ادارہ نورِ حق میں پریس کانفرنس کرتے ہوئے انہوں نے انکشاف کیا کہ حکومت عوام سے ہر ماہ 150 ارب روپے سے زائد کی لیوی وصول کر رہی ہے۔ حافظ نعیم نے بتایا کہ ان کی وزیراعظم شہباز شریف اور نائب وزیراعظم اسحاق ڈار سے ملاقاتیں ہوئی ہیں جس میں انہوں نے مطالبہ کیا کہ غریب اور متوسط طبقے کو ریلیف دینے کے لیے پیٹرولیم لیوی فوری ختم کی جائے، جبکہ بڑی اور مہنگی گاڑیوں پر بے شک اضافی لیوی لگائی جائے۔ انہوں نے موجودہ وفاقی و صوبائی حکومتوں کو ‘فارم 47 کی پیداوار’ قرار دیتے ہوئے کراچی و سندھ کی تباہی کا ذمہ دار کرپشن کو ٹھہرایا اور فلسطین و غزہ کی صورتحال کا حوالہ دیتے ہوئے امتِ مسلمہ کو یکجا ہونے اور ایک نئے عالمی نظام کے قیام پر زور دیا۔