امریکی فوج کی خلائی مخلوق کیساتھ خفیہ جنگ کا انکشاف، 3 ایلیئنز ہلاک

سابق امریکی آرمی سنائیپر نک بیٹس نے ایک پوڈ کاسٹ کے دوران سنسنی خیز دعویٰ کیا ہے کہ نیواڈا میں واقع امریکی فوج کے پراسرار اڈے ‘ایریا 51’ (Area 51) کے قریب ایک انتہائی خفیہ زیرِ زمین آپریشن کے دوران امریکی فوجیوں نے ریپٹیلین (چھپکلی نما) دکھائی دینے والی 3 خلائی مخلوقات (ایلیئنز) کو فائرنگ کر کے ہلاک کر دیا تھا۔

نک بیٹس نے دعویٰ کیا کہ یہ واقعہ اس وقت پیش آیا جب فورٹ براگ سے ایک فوجی یونٹ کو ہنگامی بنیادوں پر ایریا 51 کی ایک زیرِ زمین تنصیب پر روانہ کیا گیا، کیونکہ وہاں تعینات عملے اور ریسکیو ٹیم سے رابطہ منقطع ہو گیا تھا۔ ان کے مطابق فوجیوں کو جدید ترین انرجی ویپنز (Energy Weapons) فراہم کر کے زیرِ زمین سرنگ میں اتارا گیا، جہاں ان کا سامنا دو ٹانگوں پر چلنے والی پراسرار مخلوق سے ہوا۔ اس جھڑپ کے دوران فائرنگ کے تبادلے میں ایک امریکی فوجی بھی مارا گیا، جسے بعد میں سرکاری ریکارڈ میں ایک ‘تربیتی حادثہ’ قرار دے کر معاملے کو دبا دیا گیا۔

نک بیٹس کے مطابق جب انہوں نے اس واقعے سے متعلق سوالات اٹھائے تو انہیں سینئر حکام کی جانب سے خاموش رہنے کی سخت دھمکیاں دی گئیں۔ تاہم، ان تمام حیران کن دعوؤں کی تصدیق کے لیے اب تک کوئی بھی باضابطہ فوجی ریکارڈ، تصاویر یا آزادانہ شواہد سامنے نہیں آ سکے ہیں۔ واضح رہے کہ نیواڈا میں واقع ایریا 51 طویل عرصے سے خلائی مخلوق اور نامعلوم اڑن طششتریوں (UFOs) کی افواہوں کا مرکز رہا ہے