مریم نواز کا خواتین اور بچوں کے خلاف بڑھتے جرائم پر اظہار برہمی

وزیراعلیٰ پنجاب مریم نواز شریف نے صوبے میں خواتین اور بچوں کے خلاف بڑھتے ہوئے جرائم، تشدد اور زیادتی کے واقعات پر شدید برہمی اور تشویش کا اظہار کرتے ہوئے پولیس و قانون نافذ کرنے والے اداروں کو ملزمان کے خلاف فوری اور سخت ترین قانونی کارروائی کی ہدایت کی ہے۔

ایک اعلٰی سطح کے اجلاس کی صدارت کرتے ہوئے وزیراعلیٰ مریم نواز نے واضح کیا کہ خواتین اور بچوں کی حفاظت اور ان کے حقوق کا تحفظ حکومتِ پنجاب کی اولین ترجیح ہے۔ انہوں نے آئی جی پنجاب کو ہدایت کی کہ ایسے تمام کیسز کی بذاتِ خود نگرانی کی جائے اور متاثرہ خاندانوں کو بلا تاخیر انصاف کی فراہمی یقینی بنائی جائے۔

وزیراعلیٰ پنجاب کا مزید کہنا تھا کہ معاشرے کے اس حساس طبقے پر ہاتھ ڈالنے والے درندے کسی رعایت کے مستحق نہیں ہیں اور ایسے عناصر کو قانون کے کٹہرے میں لاکر کیفرِ کردار تک پہنچایا جائے گا تاکہ آئندہ کے لیے ایک مثال قائم کی جا سکے۔