بیرون ملک بیٹھے یوٹیوبرز پی ٹی آئی کے سب سے بڑے دشمن ہیں: خواجہ آصف

وفاقی وزیرِ دفاع خواجہ محمد آصف نے بیرونِ ملک مقیم یوٹیوبرز پر سخت تنقید کرتے ہوئے انہیں پاکستان تحریک انصاف (پی ٹی آئی) کا سب سے بڑا سیاسی دشمن قرار دے دیا ہے۔

سماجی رابطے کی ویب سائٹ ‘ایکس’ (سابقہ ٹوئٹر) پر اپنے ایک شوخ بیان میں خواجہ آصف نے کہا کہ بیرونِ ملک محفوظ مقامات پر بیٹھے یوٹیوبرز پی ٹی آئی کے نام پر ڈالر کما کر نوٹ چھاپ رہے ہیں، جبکہ ان کی منفی، اشتعال انگیز اور گمراہ کن پوسٹس کا خمیازہ اور قیمت ملک کے اندر موجود تحریک انصاف اور اس کی قیادت کو چکانی پڑتی ہے۔

وزیرِ دفاع نے افسوس کا اظہار کرتے ہوئے کہا کہ ایسی صورتحال انہوں نے ماضی میں کبھی نہیں دیکھی جہاں جس شخص یا جماعت کی حمایت کا دعویٰ کیا جا رہا ہو، اسی کی آزمائشوں، گرفتاریوں اور مشکلات کو بیچ کر بیرونی کرنسی کمائی جا رہی ہو۔ خواجہ آصف کا مزید کہنا تھا کہ پی ٹی آئی کے دورِ حکومت میں تو ان یوٹیوبرز کی عید تھی ہی، لیکن آج جب جماعت اقتدار میں نہیں ہے تب بھی یہ لوگ اپنی جیبیں بھرنے میں مصروف ہیں اور درحقیقت اس پوری سیاسی جماعت کو انہی بیرونِ ملک یوٹیوبرز نے تباہ و برباد کر کے رکھ دیا ہے۔