2045 تک خلا میں لاکھوں انسان آباد ہوں گے: جیف بیزوس کی پیش گوئی

عالمی ٹیکنالوجی و خلائی صنعت کی ممتاز شخصیات نے پیش گوئی کی ہے کہ اگلے دو عشروں کے دوران خلائی ٹیکنالوجی میں اتنی غیر معمولی پیش رفت ہو جائے گی کہ لاکھوں انسان خلا میں مستقل رہائش اختیار کر سکیں گے۔

‘ایمازون’ اور خلائی کمپنی ‘بلیو اوریجن’ کے بانی جیف بیزوس نے اٹلی میں ایک ٹیک کانفرنس سے خطاب کرتے ہوئے کہا کہ آئندہ دو دہائیوں میں لاکھوں افراد اپنی مرضی سے خلا میں آباد ہوں گے۔ ان کا کہنا تھا کہ مستقبل میں چاند یا دیگر سیاروں پر مشکل اور پیچیدہ کام انسانوں کے بجائے روبوٹس سے کروانا زیادہ محفوظ اور کم خرچ ثابت ہوگا۔ مصنوعی ذہانت (AI) اور ملازمتوں سے متعلق خدشات پر بات کرتے ہوئے بیزوس نے کہا کہ ماضی میں ‘ہل’ کی ایجاد کی طرح جدید ٹیکنالوجی بھی انسانی خوشحالی میں اضافہ کرے گی۔

اسی نظریے سے اتفاق کرتے ہوئے ‘اوپن اے آئی’ (OpenAI) کے سربراہ سیم آلٹمین نے پیش گوئی کی ہے کہ اگلے دس برسوں میں یونیورسٹی سے فارغ التحصیل نوجوان خلا میں پرکشش اور جدید ملازمتیں حاصل کر سکیں گے۔ دوسری جانب ‘اسپیس ایکس’ کے مالکانہ حقوق رکھنے والے ایلون مسک 2028ء تک مریخ پر انسان بھیجنے کے منصوبے پر گامزن ہیں، جبکہ ‘وائجر ٹیکنالوجیز’ کے سربراہ ڈیلن ٹیلر نے بھی 2030ء کی دہائی تک خلا میں باقاعدہ انسانی آبادی کی پیش گوئی کی ہے۔ تاہم ماہرین کے مطابق اس بڑے خواب کی تعبیر کے لیے بھاری اخراجات اور عملی چیلنجز اب بھی درپیش ہیں۔