افغان طالبان اہلکاروں کی چینی سرحد پر بھی دراندازی کی کوشش، چین کی سخت تنبیہ

افغان طالبان کے اہلکاروں نے چین کی سرحدی سرحد پر دراندازی کی ناکام کوشش کی ہے، جس پر چینی حکام نے سخت برہمی کا اظہار کرتے ہوئے طالبان کو فوری طور پر علاقہ چھوڑنے کی سخت تنبیہ کی ہے۔

افغان جریدے ‘افغانستان انٹرنیشنل’ کی رپورٹ کے مطابق طالبان رجیم میں افغانستان سے سرحد پار دہشت گردی اور غیر قانونی دراندازی کے بڑھتے ہوئے واقعات نے خطے کے تمام ہمسایہ ممالک کو تشویش میں مبتلا کر دیا ہے۔ رپورٹ میں بتایا گیا ہے کہ وخان راہداری (Wakhan Corridor) کے قریب سے دراندازی کی اس تازہ کوشش پر چینی سرحدی فورسز نے فوری اقدام اٹھاتے ہوئے افغان طالبان کو وارننگ جاری کی۔

طالبان کی حکومت قائم ہونے کے بعد سے چین نے سیکیورٹی خدشات کے پیش نظر افغان سرحد پر کڑی نگرانی، خاردار باڑ کی تنصیب اور جدید کیمروں کے ذریعے مانیٹرنگ کا نظام نافذ کر رکھا ہے۔ دراندازی اور دہشت گردی کے خطرات کے سبب چین نے افغانستان کے ساتھ متصل واخان بارڈر کراسنگ کو تاحال مکمل طور پر بند رکھا ہوا ہے۔ رپورٹس کے مطابق خطے کے تمام ممالک افغانستان سے بڑھتے ہوئے سیکیورٹی خطرات کے باعث اپنی سرحدوں کی نگرانی مزید سخت کر رہے ہیں۔