چین: دلہا اور دلہن دونوں کا ایک ہی نام، سوشل میڈیا پر وائرل

چین کے صوبے ژجیانگ (Zhejiang) میں ایک نوبیاہتا جوڑا اپنے حیرت انگیز اور منفرد اتفاق کی وجہ سے سوشل میڈیا پر توجہ کا مرکز بن گیا ہے، جہاں دلہا اور دلہن کا نہ صرف نام ایک ہے بلکہ دونوں ایک ہی پیشہ ورانہ شعبے سے بھی منسلک ہیں۔

صوبے ژجیانگ میں 6 اکتوبر 2026ء کو رشتہ ازدواج میں منسلک ہونے والے 33 سالہ دلہا اور 28 سالہ دلہن دونوں کا نام ‘زو شیاؤ کونگ’ (Zhou Xiaocong) ہے، جسے چینی زبان میں بالکل ایک جیسے حروف کے ساتھ لکھا جاتا ہے۔ دونوں کی پہلی ملاقات 2016ء میں ایک جاب فیئر کے دوران ہوئی تھی جب انٹرویو کے لیے ایک ہی نام پکارے جانے پر دونوں بیک وقت کھڑے ہو گئے تھے۔ دونوں سول ایوی ایشن کے شعبے میں ملازمت کرتے ہیں، جہاں دلہن فلائٹ اٹینڈنٹ ہیں جبکہ دلہا ایوی ایشن سیفٹی آفیسر ہیں۔

2019ء سے رشتے میں منسلک اس جوڑے کو رواں سال مئی میں شادی کی قانونی رجسٹریشن اور جائیداد کی ملکیت کے کاغذات بنواتے وقت اس عجیب صورتحال کا سامنا بھی کرنا پڑا جب کمپیوٹر سسٹم نے ایک ہی نام کی وجہ سے درخواست پروسیس کرنے سے انکار کر دیا، جس کے بعد سرکاری عملے نے تمام کارروائی دستی (Manually) مکمل کی۔ سوشل میڈیا صارفین اور ان کے رشتہ دار اس انوکھے جوڑے کے اتحاد کو قسمت کا تحفہ قرار دے رہے ہیں۔