شکاگو ایئرپورٹ پر طوطے کی شرارتیں، مسافروں کے لیے نئی مشکل کھڑی ہوگئی

امریکہ کے شہر شکاگو کے معروف اوہیر انٹرنیشنل ایئرپورٹ (O’Hare International Airport) پر ایک سبز رنگ کے غیر ملکی پرندے کی ناگہانی آمد نے مسافروں، ایئرپورٹ سیکورٹی اور ایئرلائن کے عملے کو حیران و پریشان کر دیا۔

غیر ملکی خبر رساں ادارے کے مطابق یہ دلچسپ و عجیب واقعہ 13 اکتوبر کو اوہیر ایئرپورٹ کے ٹرمینل 5 میں پیش آیا، جہاں ایئر فرانس کے چیک اِن کاؤنٹر کے قریب طوطے کی نسل سے تعلق رکھنے والے ایک سبز رنگ کے پرندے کو آزادانہ گھومتے ہوئے دیکھا گیا۔ پرندہ کبھی مسافروں کے سروں پر جا بیٹھتا تو کبھی ان کے سامان کے اوپر پرواز کرنے لگتا۔ جب ایئرپورٹ پر موجود افراد نے اسے پکڑ کر محفوظ مقام پر منتقل کرنے کی کوشش کی تو اس نے خلافِ توقع شدید جارحانہ رویہ اختیار کر لیا۔

سوشل میڈیا پر وائرل ہونے والی ویڈیوز میں دیکھا جا سکتا ہے کہ جب بھی کوئی شخص پرندے کو پکڑنے یا چھونے کے لیے آگے بڑھتا، وہ بھاگنے کے بجائے چونچیں مار کر حملہ آور ہو جاتا۔ ایئرپورٹ کے ایک ملازم پیرس ایلبَرٹ نے امریکی میڈیا کو بتایا کہ پرندہ ٹرمینل کے ایک کھلے دروازے سے اندر داخل ہوا تھا۔ بالآخر ایک منپرٹ صفائی کرنے والے ملازم نے اپنی قمیض (Shirt) کی مدد سے دانشمندی کا مظاہرہ کرتے ہوئے پرندے کو بحفاظت قابو کر لیا