15 اکتوبر کے بعد گوشوارے جمع کرانے والے تاجروں پر 25 ہزار روپے جرمانے کا فیصلہ

فیڈرل بورڈ آف ریونیو (ایف بی آر) نے آسان ٹیکس سکیم کے تحت 15 اکتوبر کے بعد انکم ٹیکس گوشوارے جمع کرانے والے تاجروں پر 25 ہزار روپے جرمانہ عائد کرنے کا فیصلہ کیا ہے۔ ایف بی آر ذرائع کے مطابق مقررہ تاریخ کے بعد گوشوارے فائل کرنے والے تاجروں کو رجسٹریشن کی مد میں 25 ہزار اور جرمانے کی مد میں مزید 25 ہزار روپے ادا کرنا ہوں گے۔ آسان ٹیکس سکیم کے تحت اب تک محض 150 سے کم نئے گوشوارے موصول ہونے پر وزیر مملکت برائے خزانہ نے بھی تشویش کا اظہار کیا ہے۔ دوسری جانب ذرائع کے مطابق مالی سال 2026 کے لیے ملک بھر سے اب تک کل 66 لاکھ انکم ٹیکس گوشوارے جمع ہو چکے ہیں، جبکہ ایف بی آر نے وضاحت کی ہے کہ صرف تنخواہ پر انحصار کرنے والے ملازمین کو ایڈوانس انکم ٹیکس کے نوٹس جاری نہیں کیے جائیں گے۔