کوئٹہ طیارہ حادثے میں شہید فوجی افسران کی نماز جنازہ ادا، وزیراعظم، فیلڈ مارشل کی شرکت

کوئٹہ کے علاقے نواں کلی کے قریب مشاق تربیتی طیارے کے حادثے میں جامِ شہادت نوش کرنے والے پاک فوج کے افسران میجر حسنین شہزاد ہمایوں اور کیپٹن عبدالصمد کی نمازِ جنازہ چکلالہ گیریژن راولپنڈی میں ادا کر دی گئی ہے۔ پاک فوج کے شعبہ تعلقات عامہ (ISPR) کے مطابق نمازِ جنازہ میں وزیراعظم محمد شہباز شریف، فیلڈ مارشل و چیف آف آرمی سٹاف سید عاصم منیر، نائب وزیراعظم، وزیر اطلاعات اور اعلیٰ سول و عسکری حکام نے شرکت کی۔ دونوں افسران 12 اکتوبر کو تربیتی پرواز کے دوران حادثے کا شکار ہو کر شہید ہوئے تھے۔ ترجمان پاک فوج نے کہا کہ پوری قوم شہیدوں کی جرات، قربانی اور وطن سے لازوال وابستگی کو سلام پیش کرتی ہے۔ دونوں شہدا کو ان کے آبائی علاقوں میں مکمل فوجی اعزاز کے ساتھ سپردِ خاک کیا جائے گا۔