پاکستان سٹاک مارکیٹ میں مندی، ہنڈرڈ انڈیکس 1964 پوائنٹس گر گیا

پاکستان اسٹاک ایکسچینج (PSX) میں نئے کاروباری ہفتے کے پہلے روز شدید مندی کا رجحان غالب رہا، جس کے باعث 100 انڈیکس میں 19 سو سے زائد پوائنٹس کی بڑی کمی ریکارڈ کی گئی اور سرمایہ کاروں کو اربوں روپے کا معاشی نقصان برداشت کرنا پڑا۔ کاروباری روز کے آغاز پر ہی مارکیٹ پر نفع کمانے کے لیے شیئرز کی فروخت اور سیاسی و سیکیورٹی خدشات کا دباؤ دیکھا گیا، جس سے انڈیکس ابتدائی مرحلے میں ہی 900 پوائنٹس کی کمی سے 1 لاکھ 66 ہزار 100 کی سطح سے نیچے آ گیا۔ دن بھر ٹریڈنگ کے دوران مندی کا یہ سلسلہ برقرار رہا اور کاروبار کے اختتام پر KSE-100 انڈیکس مجموعی طور پر 1,964 پوائنٹس کی نمایاں کمی کے بعد 1 لاکھ 65 ہزار 124 پوائنٹس کی سطح پر بند ہوا۔ یاد رہے کہ گزشتہ کاروباری ہفتے کے آخری روز بھی ملا جلا رجحان رہنے کے بعد انڈیکس 352 پوائنٹس کی کمی کے ساتھ 1 لاکھ 67 ہزار 089 کی سطح پر بند ہوا تھا۔