یورپ کی جانب غیر قانونی نقل مکانی کا خاتمہ اگلا ہدف ہے: محسن نقوی

وفاقی وزیر داخلہ محسن نقوی سے یورپی کمشنر برائے داخلی امور و مائیگریشن میگنس برنر (Magnus Brunner) نے اعلیٰ سطح وفد کے ہمراہ ملاقات کی، جس میں غیر قانونی مائیگریشن کی روک تھام، بارڈر سیکیورٹی اور ہنرمند پاکستانی افرادی قوت کے لیے قانونی ویزوں کے فروغ پر تفصیلی تبادلہ خیال کیا گیا۔ یورپی کمشنر نے پاکستان کے مؤثر اقدامات اور ایف آئی اے (FIA) کی کارکردگی کو سراہتے ہوئے کہا کہ پاکستان کی انسدادی پالیسی کے باعث یورپ کی جانب غیر قانونی مائیگریشن میں 64 فیصد کی نمایاں کمی آئی ہے جو قابلِ ستائش ہے۔ اِس موقع پر محسن نقوی نے واضح کیا کہ پاکستان نے غیر قانونی مائیگریشن پر زیرو ٹالرنس پالیسی اختیار کر رکھی ہے اور حکومت کا اگلا ہدف اِس کا 100 فیصد خاتمہ کرنا ہے۔ ملاقات میں دونوں فریقین نے یورپی یونین کے ‘ایسٹرن کوریڈور انیشیٹو’ پر مشترکہ العمل، بارڈر مینجمنٹ اور پاکستان کوسٹ گارڈز کی استعداد کار بڑھانے میں تعاون کو مزید مضبوط بنانے پر اتفاق کیا۔