آبادی میں تیز رفتار اضافہ صحت، تعلیم اور روزگار کیلئے بڑا چیلنج ہے: وزیر خزانہ

وفاقی وزیر خزانہ محمد اورنگزیب نے عالمی بینک کے زیرِ اہتمام گول میز کانفرنس سے خطاب کرتے ہوئے کہا ہے کہ پاکستان میں آبادی کا تیز رفتار اضافہ صحت، تعلیم اور روزگار کے شعبوں کے لیے ایک سنگین چیلنج بن چکا ہے، جسے انسانی وسائل کی ترقی اور روزگار کے مواقع میں تبدیل کرنا ناگزیر ہے۔ انہوں نے بتایا کہ وزیراعظم کی سربراہی میں قومی آبادی کونسل قائم کی جا چکی ہے، جبکہ خاندانی منصوبندی، بچوں کی پیدائش میں مناسب وقفے اور آگاہی کے لیے علما و مذہبی رہنماؤں کا کردار نہایت اہم ہے۔ وزیر خزانہ نے آئی ٹی اور فری لانسنگ کے ذریعے نوجوانوں کے لیے ڈیجیٹل مہارتوں کے فروغ اور خواتین کی معاشی شمولیت کو ملکی برآمدات میں اضافے کی چابی قرار دیا۔ اِس کے علاوہ انہوں نے IFC کے علاقائی نائب صدر سے ملاقات میں نجی شعبے کی قیادت میں اقتصادی ترقی اور روزگار کے مواقع بڑھانے کے لیے تعاون مزید مضبوط بنانے پر تبادلہ خیال کیا۔