وزیر خزانہ کی سربراہ ای ایس سی اے پی سے ملاقات، معاشی اصلاحات پر گفتگو

وفاقی وزیر خزانہ محمد اورنگزیب نے عالمی بینک گروپ اور آئی ایم ایف کے سالانہ اجلاسوں 2026 کے موقع پر اقوام متحدہ کے اقتصادی و سماجی کمیشن برائے ایشیا و بحرالکاہل (UN ESCAP) کی ایگزیکٹو سیکرٹری سے اہم ملاقات کی، جس میں پاکستان کی معاشی ترجیحات، ساختی اصلاحات اور باہمی تعاون پر تفصیلی تبادلہ خیال کیا گیا۔ ملاقات میں ملک میں معاشی استحکام کی پیش رفت کو برقرار رکھنے کی اہمیت پر زور دیا گیا۔ اس موقع پر وزیر خزانہ نے واضح کیا کہ پاکستان کے لیے برآمدات پر مبنی پائیدار معاشی ترقی اور ساختی اصلاحات ناگزیر ہیں، جبکہ موسمیاتی تبدیلیاں اور تیزی سے بڑھتی ہوئی آبادی ملک کے سب سے بڑے چیلنجز ہیں۔ گفتگو کے دوران قدرتی آفات سے نمٹنے، پیشگی انتباہی نظام کے قیام، اور اسٹیٹ بینک آف پاکستان (SBP) کے لیے ممکنہ تکنیکی معاونت کے شعبوں میں تعاون زیر غور آیا۔ محمد اورنگزیب نے زور دیا کہ معاشی پالیسیوں کے تجزیے کو عملًا قابلِ پیمائش نتائج اور مثبت معاشی اقدامات میں تبدیل کرنا وقت کی اہم ضرورت ہے۔