روسی وزیر داخلہ کا پاکستان مونومنٹ، پولیس لائنز کا دورہ، پرچم کو بوسہ دیا

روس کے وزیر داخلہ ولادیمیر کولاکولتسیف نے وزیر مملکت برائے داخلہ طلال چودھری کے ہمراہ اسلام آباد پولیس لائنز کا دورہ کیا، جہاں انہیں اسلام آباد پولیس کے چاق و چوبند دستے نے گارڈ آف آنر اور سلامی پیش کی جبکہ دونوں ممالک کے قومی ترانے بھی بجائے گئے۔ تقریب کے دوران روسی وزیر داخلہ نے پیش کردہ پاکستانی پرچم کو احتراماً بوسہ دیا اور بہترین کارکردگی پر پولیس اہلکاروں میں انعامات تقسیم کیے۔ بعد ازاں انہوں نے پاکستان مونومنٹ شکرپڑیاں کا دورہ کیا، جہاں انہوں نے یادگارِ شہدا پر پھول چڑھائے اور شہیدوں کو خراجِ عقیدت پیش کیا۔ اس موقع پر انہوں نے وفاقی دارالحکومت کے خوبصورت اور قدرتی مناظر کی تعریف کرتے ہوئے دوطرفہ سیکیورٹی و ادارہ جاتی تعلقات کو مزید مضبوط بنانے پر زور دیا۔