روپیہ مستحکم، انٹربینک میں ڈالر مزید 3 پیسے سستا ہوگیا

انٹربینک فارن ایکسچینج مارکیٹ میں روپے کی قدر میں بہتری کا سلسلہ جاری ہے، جہاں امریکی ڈالر کے مقابلے میں پاکستانی روپیہ مزید مستحکم ہو گیا ہے۔ کاروباری ہفتے کے پہلے روز انٹربینک مارکیٹ میں امریکی کرنسی کی قیمت میں 3 پیسے کی معمولی کمی ریکارڈ کی گئی۔

سٹیٹ بینک آف پاکستان اور فاریکس ڈیلرز کی رپورٹ کے مطابق اس معمولی کمی کے بعد انٹربینک میں ڈالر 277 روپے کی سطح سے نیچے گر کر 276 روپے 97 پیسے پر بند ہوا۔ مارکیٹ ماہرین کے مطابق درامدات کے متوازن دباؤ اور بیرونِ ملک سے بھیجی جانے والی ترسیلاتِ زر میں بہتری کے باعث روپیہ مسلسل استحکام دکھا رہا ہے۔

واضح رہے کہ گزشتہ کاروباری ہفتے کے آخری روز انٹربینک مارکیٹ میں امریکی ڈالر 277 روپے کی سطح پر بند ہوا تھا۔ معاشی تجزیہ کاروں کا کہنا ہے کہ آئی ایم ایف اور دیگر بین الاقوامی مالیاتی اداروں سے ملنے والی مثبت خبروں کے باعث کرنسی مارکیٹ میں روپیہ مضبوط پوزیشن پر قائم ہے۔