سٹاک مارکیٹ میں اتار چڑھاؤ، ہنڈرڈ انڈیکس منفی زون میں بند ہوا

پاکستان سٹاک مارکیٹ (PSX) میں کاروباری ہفتے کے دوسرے روز ملا جلا رجحان دیکھا گیا، جہاں ابتدائی سیشن کی بڑی تیزی کے بعد مندی غالب آ گئی۔ کاروبار کے آغاز پر ہنڈرڈ انڈیکس 900 سے زائد پوائنٹس کے اضافے کے ساتھ ایک لاکھ 66 ہزار 70 پوائنٹس کی بلند سطح کو چھو گیا تھا، تاہم ٹریڈنگ کے اختتامی مراحل میں پرافٹ ٹیکنگ اور فروخت کے دباؤ کے باعث مارکیٹ منفی زون میں داخل ہو گئی۔ دن کے اختتام پر 100 انڈیکس 347 پوائنٹس کی کمی کے ساتھ ایک لاکھ 64 ہزار 776 پوائنٹس کی سطح پر بند ہوا، جبکہ اس سے قبل گزشتہ کاروباری روز بھی انڈیکس میں 1964 پوائنٹس کی نمایاں کمی ریکارڈ کی گئی تھی۔