سی آئی اے چیف سے صدر پوتن کی ملاقات سے انکار کی خبریں بے بنیاد ہیں: کریملن

ماسکو: کریملن کے صدارتی معاون یوری اوشاکوف نے مغربی میڈیا کی ان رپورٹس کو یکسر مسترد کر دیا ہے جن میں دعویٰ کیا گیا تھا کہ روسی صدر ولادیمیر پیوٹن نے امریکی خفیہ ادارے (CIA) کے ڈائریکٹر جان ریٹکلف سے ماسکو میں ملاقات سے انکار کیا تھا۔

صحافیوں سے گفتگو کرتے ہوئے یوری اوشاکوف نے وضاحت کی کہ صدر پیوٹن اور سی آئی اے کے ڈائریکٹر کے درمیان ملاقات کا کوئی پہلے سے طے شدہ منصوبہ یا شیڈول ہی موجود نہیں تھا۔ انہوں نے بتایا کہ 25 اگست کو جان ریٹکلف کے دورۂ ماسکو کے دوران ان کی تمام تر ملاقاتیں اور گفتگو روسی انٹیلی جنس اداروں کے اعلیٰ حکام کے ساتھ ہوئی تھیں۔ کریملن معاون کا کہنا تھا کہ یہ تمام تر رابطے مکمل طور پر سرکاری اور خفیہ (Confidential) نوعیت کے تھے، اس لیے ان کی تفصیلات جاری نہیں کی جا سکتیں۔

اس سے قبل کریملن کے ترجمان دیمتری پیسکوف بھی یہ واضح کر چکے ہیں کہ امریکی انٹیلی جنس چیف کا دورہ روس دونوں ممالک کی مابین معمول کے انٹیلی جنس رابطوں کا حصہ تھا۔ روس کی فارن انٹیلی جنس سروس (SVR) کے سربراہ سرگئی ناریشکن نے بھی جان ریٹکلف کے ساتھ اپنی ملاقات کی تصدیق کرتے ہوئے کہا کہ مختلف ممالک کے خفیہ اداروں کے سربراہان کے درمیان اس قسم کے پیشہ ورانہ رابطے بین الاقوامی معمول کا حصہ ہوتے ہیں۔