یونٹی فوڈز کے شیئرز میں مبینہ انسائیڈر ٹریڈنگ، ایس ای سی پی کی تحقیقات میں تیزی

اسلام آباد: سیکیورٹیز اینڈ ایکسچینج کمیشن آف پاکستان (SECP) نے یونٹی فوڈز (Unity Foods) کے شیئرز میں مبینہ انسائیڈر ٹریڈنگ اور غیر معمولی خریدو فروخت کی باضابطہ تحقیقات تیز کرتے ہوئے کمپنی کے چیف ایگزیکٹو آفیسر (CEO) محمد فرخ سمیت چار افراد کو حتمی نوٹسز جاری کر دیے ہیں۔

ایس ای سی پی کے مطابق سیکیورٹیز ایکٹ 2015ء کے سیکشن 139 کے تحت یونٹی فوڈز کی شیئر ٹریڈنگ کی باضابطہ تحقیقات 2 جون سے جاری ہیں۔ کمیشن نے عدم پیشی پر نوٹس لیتے ہوئے سی ای او محمد فرخ، صفدر سجاد، فہمیدہ امین اور حنا صفدر کو 3 ستمبر کو ذاتی حیثیت میں تحقیقاتی ٹیم کے سامنے پیش ہونے کا حکم دیا ہے۔ اس سے قبل یہ چاروں افراد 31 اگست کو دیے گئے پہلے نوٹس پر پیش نہیں ہوئے تھے، جس کے بعد اب انہیں تمام تر معاون دستاویزات اور ریکارڈ کے ساتھ طلب کیا گیا ہے۔

ایس ای سی پی نے سی ای او محمد فرخ سے یونٹی فوڈز کے شیئرز بینکوں کے پاس گروی (Pledge) رکھنے کا مکمل باضابطہ ریکارڈ طلب کیا ہے، جبکہ صفدر سجاد، فہمیدہ امین اور حنا صفدر کو شیئرز کی خریدو فروخت پر اپنی وضاحت پیش کرنے کی ہدایت کی گئی ہے۔ ریگولیٹری باڈی کا کہنا ہے کہ قانون کے مطابق جواب نہ دینے یا پیش نہ ہونے کی صورت میں یکطرفہ قانونی کارروائی عمل میں لائی جائے گی۔