بانی پی ٹی آئی سے ملاقات اور بچوں سے بات نہ کروانے کا معاملہ، توہینِ عدالت کی درخواست دائر

اسلام آباد: بانی پی ٹی آئی کے علاج معالجے، ہسپتال منتقلی اور خاندانی ملاقاتوں کے معاملے پر ان کی ہمشیرہ ڈاکٹر عظمیٰ خان نے سپریم کورٹ آف پاکستان میں توہینِ عدالت کی دوسری درخواست باضابطہ طور پر دائر کر دی ہے۔

درخواست گزار نے مؤقف اختیار کیا ہے کہ عدالتی حکام اور انتظامیہ کی جانب سے 18 اگست کے صریح عدالتی حکم کی سنگین ورزی کی جا رہی ہے۔ درخواست میں الزام عائد کیا گیا ہے کہ واضح ہدایات کے باوجود بانی پی ٹی آئی سے ملاقات نہیں کروائی جا رہی اور نہ ہی انہیں اپنے بچوں کے ساتھ ٹیلی فون پر گفتگو کرنے کی سہولت فراہم کی جا رہی ہے۔ مزید برآں، درخواست میں ڈاکٹر عظمیٰ خان، علیمہ خان اور قاسم زمان کو بانی پی ٹی آئی سے ملاقات کرنے سے مسلسل روکے جانے کا معاملہ بھی اٹھایا گیا ہے۔

ڈاکٹر عظمیٰ خان کی جانب سے توہینِ عدالت کی مرکزی درخواست کے ساتھ اہم اضافی دستاویزات اور دو متفرق (CMs) درخواستیں بھی جمع کروائی گئی ہیں۔ درخواست میں استدعا کی گئی ہے کہ سپریم کورٹ اپنے 18 اگست کے احکامات پر من و عن عملدرآمد یقینی بنائے اور عدالتی حکم کی عدم تعمیل پر ذمہ داران کے خلاف قانون کے مطابق توہینِ عدالت کی کارروائی عمل میں لائے۔