امریکی، روسی اور چینی صدور کی ایشیا پیسفک سربراہ کانفرنس کے موقع پر ملاقات متوقع

کریملن نے کہا ہے کہ روسی صدر ولادی میر پیوٹن، امریکی صدر ڈونلڈ ٹرمپ اور چینی صدر شی جن پنگ کے درمیان نومبر میں ہونے والی ایشیا پیسیفک اکنامک کوآپریشن (APEC) سربراہ کانفرنس کے موقع پر سہ فریقی ملاقات ہو سکتی ہے۔ سرکاری روسی ٹیلی ویژن پر گفتگو کرتے ہوئے کریملن کے معاون یوری اوشاکوف نے تصدیق کی کہ اس معاملے پر بات چیت ہوئی ہے اور تینوں رہنماؤں کی کانفرنس میں شرکت متوقع ہے۔ واضح رہے کہ چین کے شہر شین ژین میں 18 اور 19 نومبر کو اپیک سربراہ اجلاس کا انعقاد ہونا ہے۔ دوسری جانب وائٹ ہاؤس کی ترجمان اینا کیلی کا کہنا ہے کہ فی الحال صدر ڈونلڈ ٹرمپ کی اس کانفرنس میں شرکت کا باضابطہ اعلان سامنے نہیں آیا ہے۔