ایف سی بلوچستان ٹریننگ سینٹر خضدار میں بیسک ملٹری ٹریننگ بیچ 76 کی پاسنگ آؤٹ پریڈ

خضدار: فرنٹیر کور (ایف سی) بلوچستان (ساؤتھ) کے ٹریننگ سینٹر خضدار میں بیسک ملٹری ٹریننگ بیچ 76 کی پروقار پاسنگ آؤٹ پریڈ منعقد ہوئی، جس میں 1422 ریکروٹس اپنی بنیادی ملٹری تربیت کی کامیابی سے تکملہ کے بعد باقاعدہ طور پر پاس آؤٹ ہو گئے۔

تقریب کے مہمانِ خصوصی کمانڈنٹ خضدار تھے، جبکہ پاسنگ آؤٹ پریڈ میں علاقائی و مقامی عمائدین، سول و عسکری حکام، شہداء کے لواحقین اور طلبہ و طالبات کی بڑی تعداد نے شرکت کی۔ اس موقع پر پاس آؤٹ ہونے والے جوانوں نے اپنی پیشہ ورانہ صلاحیتوں، فوجی تربیت اور پیشہ ورانہ مہارتوں کا شاندار عملی مظاہرہ پیش کیا۔

کمانڈنٹ خضدار نے پاس آؤٹ ہونے والے تمام ریکروٹس کو مبارکباد پیش کرتے ہوئے ان کے عزم، نظم و ضبط اور مادرِ وطن کی دفاعی صلاحیتوں کو سراہا۔ تقریب کے اختتام پر دورانِ تربیت شاندار اور بہترین مجموعی کارکردگی کا مظاہرہ کرنے والے ریکروٹ محمد طاہر کو معزز ‘آئی جی ایف سی میڈل’ سے نوازا گیا۔