ریاض: پاکستان اور سعودی عرب کے درمیان اہم سائبر سیکیورٹی معاہدے پر دستخط

ریاض: پاکستان اور مملکتِ سعودی عرب نے سائبر اسپیس کے تحفظ، ابھرتے ہوئے ڈیجیٹل خطرات سے نمٹنے اور باہمی تعاون کو فروغ دینے کے لیے ایک اہم معاہدے (MoU) پر باضابطہ دستخط کر دیے ہیں۔

سعودی عرب کے دارالحکومت ریاض میں منعقدہ تقریب کے دوران پاکستان کی جانب سے وفاقی وزیر برائے معلومات و ٹیکنالوجی (IT) شزہ فاطمہ اور سعودی عرب کی نیشنل سائبر سیکیورٹی اتھارٹی (NCA) کے گورنر انجینئر ماجد المزید نے اس یادداشت پر دستخط کیے۔ اس معاہدے کا بنیادی مقصد دونوں برادر ممالک کے اہم قومی و معاشی مفادات اور ڈیجیٹل انفراسٹرکچر کو سائبر حملوں سے محفوظ بنانا ہے۔

معاہدے کے تحت پاکستان اور سعودی عرب سائبر سیکیورٹی کے شعبے میں مہارت، ٹیکنالوجی اور معلومات کا تبادلہ کریں گے جبکہ عالمی سطح پر سائبر چیلنجز سے نمٹنے کے لیے باہمی تعاون کو مزید مضبوط بنایا جائے گا۔ دونوں رہنماؤں نے امید ظاہر کی کہ اس شراکت داری سے دونوں ممالک کی سائبر دفاعی صلاحیتوں میں نمایاں اضافہ ہوگا اور ابھرتے ہوئے عالمی سائبر خطرات کے خلاف مؤثر حکمتِ عملی اپنائی جا سکے گی۔