وزیراعظم ’اپنا گھر اسکیم‘: دو ماہ میں منظور شدہ ہاؤسنگ فنانسنگ میں 117 فیصد کا ریکارڈ اضافہ

اسلام آباد: مشیر وزارتِ خزانہ خرم شہزاد نے سوشل میڈیا پلیٹ فارم ایکس (سابقہ ٹویٹر) پر جاری ایک بیان میں انکشاف کیا ہے کہ وزیراعظم ’اپنا گھر اسکیم‘ کے تحت منظور شدہ ہاؤسنگ فنانسنگ کا کل حجم 313 ارب روپے سے تجاوز کر گیا ہے، جس میں گزشتہ دو ماہ کے دوران 117 فیصد کا نمایاں اضافہ ریکارڈ کیا گیا۔

مشیر وزارتِ خزانہ کے مطابق جون 2026ء سے اب تک اس اسکیم کے تحت 53,100 سے زائد قرضے منظور کیے جا چکے ہیں۔ صرف گزشتہ دو ماہ کے دوران منظور شدہ قرضوں میں 111 فیصد کا اضافہ دیکھنے میں آیا۔ اسی عرصے کے دوران جاری کردہ (Disbursed) قرضوں میں 83 فیصد اضافے کے ساتھ 8,700 سے زائد نادہندگان کو رقوم فراہم کی گئیں، جس کا مجموعی حجم 120 فیصد اضافے کے بعد 45 ارب روپے سے زائد بنتا ہے۔

خرم شہزاد نے اس بات پر زور دیا کہ ہاؤسنگ فنانسنگ کا فائدہ صرف شہریوں کو ذاتی گھر کی فراہمی تک محدود نہیں ہے، بلکہ اس سے سیمنٹ، اسٹیل اور دیگر تعمیراتی سامان کی طلب میں اضافہ ہو رہا ہے جس سے ملکی معیشت کو تحرک مل رہا ہے۔ انہوں نے مزید بتایا کہ پاکستان میں اس وقت 1 کروڑ سے 1 کروڑ 20 لاکھ گھروں کی شدید شارٹیج ہے، جبکہ ملک میں ہر سال مزید 3 لاکھ 50 ہزار سے 4 لاکھ نئے گھروں کی ضرورت پیش آتی ہے، جس کی تکمیل کے لیے یہ اسکیم انتہائی کارآمد ثابت ہو رہی ہے۔