یوم دفاع و شہداء: پشاور کے تعلیمی اداروں میں پاک فوج کے زیراہتمام تقریبات

یومِ دفاع و شہداء کے موقع پر آئی سی ایم ماڈل اسکول، پلے بی کیڈٹ کالج اور علی گڑھ ایجوکیشن اسکول میں پُروقار تقریبات کا انعقاد کیا گیا، جس میں طلبہ و طالبات نے ملی نغموں، ٹیبلوز اور تقریری مقابلوں کے ذریعے دفاعِ وطن کے لیے جانوں کا نذرانہ پیش کرنے والے شہداء کو شاندار خراجِ عقیدت پیش کیا۔ ان تقریبات میں پاک فوج کے افسران اور جوانوں نے بھی شرکت کی اور بچوں کی حوصلہ افزائی کی۔ طلبہ نے پاک فوج کے جوانوں کے ہمراہ پرچم کشائی کی تقریب میں حصہ لیا اور وطن سے اپنی والہانہ محبت کا اظہار کیا۔ تقریبات کے اختتام پر مختلف مقابلوں میں نمایاں کارکردگی دکھانے والے طلبہ و طالبات میں انعامات تقسیم کیے گئے۔