صدر زرداری سے لندن میں محسن نقوی کی ملاقات، اہم پیغام پہنچایا

لندن: صدرِ مملکت آصف علی زرداری سے وفاقی وزیرِ داخلہ محسن نقوی نے لندن میں اہم سیاسی و انتظامی ملاقات کی، جس میں ملک کی مجموعی سیاسی صورتحال اور اہم قومی معاملا ت پر تفصیلی تبادلہ خیال کیا گیا۔

ذرائع کے مطابق دونوں رہنماؤں کے درمیان تقریباً ایک گھنٹے تک جاری رہنے والی ون آن ون گفتگو کے دوران محسن نقوی نے صدر مملکت کو ایک اہم سیاسی پیغام بھی پہنچایا۔ ملاقات کے دوران بالخصوص نئے صوبوں کی تشکیل کے حوالے سے جاری ملک گیر بحث اور قومی یکجہتی سے متعلق اہم امور زیرِ غور آئے۔

ذرائع کا کہنا ہے کہ صدر آصف علی زرداری نے نئے صوبوں کی بحث سمیت مختلف آئینی و قومی معاملات پر اپنے دیرینہ سیاسی موقف پر قائم رہنے کا اعادہ کیا۔ اس موقع پر صدر مملکت نے زور دیا کہ موجودہ چیلنجز سے نمٹنے اور قومی مفاد کے تحفط کے لیے تمام سیاسی و انتظامی فریقوں کو باہمی مشاورت کے ساتھ مل کر آگے بڑھنا ہوگا۔