وزیراعظم شہباز شریف کی بشکیک میں صدارتی محل آمد، گارڈ آف آنر پیش

بشکیک: وزیراعظم محمد شہباز شریف کے دورۂ کرغزستان کے موقع پر صدارتی محل بشکیک میں ان کے اعزاز میں ایک باضابطہ اور انتہائی پرُتپاک استقبالیہ تقریب کا انعقاد کیا گیا۔

صدارتی محل پہنچنے پر کرغزستان کے صدر صادر نور ژاپاروف نے وزیراعظم شہباز شریف کا ریڈ کارپٹ پر گرمجوشی سے استقبال کیا۔ آمد کے موقع پر دونوں ممالک کے قومی ترانے بجائے گئے، جس کے بعد کرغز مسلح افواج کے چاق و چوبند دستے نے وزیراعظم پاکستان کو احترام کے ساتھ گارڈ آف آنر پیش کیا۔ دونوں رہنماؤں نے مشترکہ طور پر گارڈ آف آنر کا معائنہ بھی کیا۔

تقریب کے دوران کرغز صدر نے وزیراعظم شہباز شریف سے اپنے کابینہ اور اعلیٰ حکام کے وفد کے ارکان کا تعارف کرایا، جبکہ وزیراعظم نے بھی صدر صادر نور ژاپاروف کا پاکستانی سرکاری وفد کے ارکان سے تعارف کروایا۔ اس استقبالیہ تقریب کے بعد دونوں رہنماؤں کے درمیان دوطرفہ اور وفود کی سطح پر اہم ملاقاتوں کا سلسلہ شروع ہوا، جس میں تجارتی، اقتصادی اور علاقائی تعاون کو مزید فروغ دینے کے عزم کا اظہار کیا گیا۔