انگلش کنڈیشنز میں بولرز کو زیادہ ذمے داری اُٹھانا پڑے گی: عمر گل

لندن: قومی کرکٹ ٹیم کے بولنگ کوچ عمر گل نے کہا ہے کہ انگلینڈ کے حالات (انگلش کنڈیشنز) میں زیادہ ذمہ داری بولرز پر عائد ہوتی ہے کیونکہ جب تک حریف ٹیم کے 20 کھلاڑیوں کو آؤٹ نہ کیا جائے، میچ جیتنا ممکن نہیں۔

لارڈز کے تاریخی میدان میں میڈیا سے گفتگو کرتے ہوئے عمر گل نے کہا کہ ہیڈنگلے میں کھیلے گئے پہلے ٹیسٹ میچ سے قبل ٹیم ویسٹ انڈیز میں شدید گرمی میں کھیل کر آئی تھی، جبکہ ہیڈنگلے کا موسم انتہائی سرد تھا، جس کی وجہ سے فاسٹ بولرز کو ان حالات سے ہم آہنگ ہونے میں کچھ وقت لگا۔

انہوں نے بتایا کہ کپتان بابر اعظم نے نیٹ پر بیٹنگ پریکٹس اور مختلف ڈرلز میں بھرپور حصہ لیا ہے اور ٹیم کی تیاری اب کافی بہتر ہے۔ فاسٹ بولر شاہین شاہ آفریدی کی دوسرے ٹیسٹ میں عدم موجودگی کے بارے میں بات کرتے ہوئے عمر گل کا کہنا تھا کہ حتمی الیون اور کھلاڑیوں کا انتخاب سلیکشن کمیٹی کا اختیار ہے۔

واضح رہے کہ ہیڈنگلے ٹیسٹ میں انگلینڈ نے پاکستان کو اننگز اور 103 رنز سے شکست دی تھی۔ قومی ٹیم اب لارڈز میں فتح حاصل کر کے سیریز برابر کرنے کے لیے میدان میں اترے گی۔