محسن نقوی سے روسی ہم منصب کی ملاقات، وفود کی سطح پر تفصیلی مذاکرات

روس کے وزیرِ داخلہ ولادیمیر کولاکولتسیف (Vladimir Kolokoltsev) نے وزارتِ داخلہ اسلام آباد کا دورہ کیا، جہاں انہوں نے وفاقی وزیرِ داخلہ محسن نقوی سے ملاقات کی اور وفود کی سطح پر تفصیلی مذاکرات کیے، جن میں وزیرِ مملکت برائے داخلہ طلال چوہدری اور اعلیٰ حکام شامل تھے۔ ملاقات میں دونوں ممالک کے درمیان منظم جرائم کی روک تھام، معلومات و مجرمان کے تبادلے، اور ری ایڈمیشن معاہدے پر عملدرآمد حتمی بنانے پر اتفاق ہوا۔ علاوہ ازیں، سائبر کرائم کے سدِباب، اینٹی نارکوٹکس، اور پولیس اکیڈمیز میں شراکت داری کو فروغ دینے کا فیصلہ کیا گیا۔ وفاقی وزیر محسن نقوی نے سائبر کرائم اور تعلیمی میدان میں روس کے تجربات سے استفادے اور پاکستانیوں کے لیے ویزا رجیم میں آسانی پر زور دیا، جبکہ روسی وزیرِ داخلہ نے دہشت گردی، منشیات اور غیر قانونی مائیگریشن کے خاتمے کے لیے مشترکہ اقدامات کو وقت کی ضرورت قرار دیا۔