خیبرپختونخوا کا فیصلہ واپس لے کر ایوان کو مضبوط بنایا جائے، یہ حکومت بندوق اور پیسے کے زور پر قائم ہے: اپوزیشن لیڈر

قومی اسمبلی کے اجلاس سے اپنے جاندار خطاب میں اپوزیشن لیڈر محمود خان اچکزئی نے خیبرپختونخوا میں ایمرجنسی اور گورنر راج کی شدید مخالفت کرتے ہوئے حکومت سے یہ فیصلے فوری واپس لینے کا مطالبہ کیا ہے۔ انہوں نے حکومتی بنچوں کو آڑے ہاتھوں لیتے ہوئے کہا کہ موجودہ حکومت پیسے اور بندوق کے زور پر مسلط ہے جس نے عوام کے ووٹ کا حق اور عوامی مینڈیٹ چھینا۔ ان کا کہنا تھا کہ صوبہ خیبرپختونخوا کے عوام اور منتخب وزیراعلیٰ ناانصافی کے خلاف کھڑے ہوئے ہیں اور تاریخ سے سبق نہ سیکھنا ملک کے لیے تباہ کن ہوگا۔ انہوں نے متنبہ کیا کہ اگر اب بھی ہوش کے ناخن نہ لیے گئے اور پارلیمان کو طاقت کا واقعی سرچشمہ نہ بنایا گیا تو آئندہ گورنر راج اور پانی کے تنازعات کا محاذ سندھ میں کھل سکتا ہے، لہٰذا حکومت غیر آئینی اقدامات کے بجائے توبہ کرے اور سیاسی انتشار کو ختم کرے۔