وفاقی آئینی عدالت: بشریٰ بی بی سزا معطلی کیس کی سماعت مکمل، فیصلہ محفوظ

وفاقی آئینی عدالت نے بانی پی ٹی آئی عمران خان کی اہلیہ بشریٰ بی بی کی سزا معطلی کی درخواستوں کے قابلِ سماعت ہونے سے متعلق کیس کی سماعت مکمل کرتے ہوئے فیصلہ محفوظ کر لیا ہے۔

کیس کی سماعت چیف جسٹس امین الدین خان کی سربراہی میں دو رکنی بینچ نے کی۔ سماعت کے دوران بشریٰ بی بی کے وکیل سلمان صفدر اور سلمان اکرم راجہ عدالت کے سامنے پیش ہوئے۔ دورانِ سماعت وکیل سلمان صفدر نے موقف اختیار کیا کہ خاتون ہونے کے ناطے عدالتوں کا ہمیشہ ایک نرم گوشہ رہا ہے، نیب کا رویہ 13 ماہ سے قابلِ اعتراض رہا اور اس نے بارہا التواء مانگ کر سزا معطلی پر اعتراضات اٹھائے۔ انہوں نے دلیل دی کہ سزا کا وقت گزرنے کے بعد اب بشریٰ بی بی کی ضمانت کا قوی قانونی جواز بن چکا ہے، جبکہ کیس کا تمام تر فوکس بانی پی ٹی آئی کی اپیل پر رہا۔

اس موقع پر بنچ کے رکن جسٹس باقی نجفی نے استفسار کیا کہ مرکزی اپیل سماعت کے لیے کتنی بار مقرر ہوئی؟ جبکہ چیف جسٹس امین الدین خان نے وکیل کو ہدایت کی کہ اس مرحلے پر کیس کے میرٹ میں نہ جائیں کیونکہ فی الوقت معاملہ صرف سزا معطلی کی درخواست تک محدود ہے۔ دلائل مکمل ہونے پر چیف جسٹس امین الدین خان نے “آرڈر کا انتظار کریں” کے الفاظ کے ساتھ فیصلہ محفوظ کر لیا۔